Галерея

Жаңалықтар
Жаңалықтар
«БЖЗҚ» АҚ салымшылар мен алушыларға ақпарат беру бойынша атқарылған жұмыстар туралы хабарлайды Баспаға басу

Бірыңғай жинақтаушы зейнетақы қорының салымшылары мен алушылары жеке зейнетақы шотынан үзінді көшірмені кез келген уақытта (электрондық тәсілмен) тегін алуға құқылы. Бұл заң жүзінде бекітілген құқық.  

Бүгінде зейнетақы жинақтарының жай-күйі туралы анықтаманы мынадай тәсілдермен алуға болады:

1)    БЖЗҚ-ға тікелей келіп өтініш беру;

2)    электрондық тәсіл, оның ішінде:

үзінді көшірме БЖЗҚ-ға ұсынылған электрондық мекенжайға жіберіледі. Салымшы (алушы) таңдап алынған кестеге сәйкес зейнетақы шотынан үзінді көшірмені: ай сайын, үш ай сайын, жарты жылда бір рет немесе жыл сайын алады; 

логин мен пароль (құпия сөз) немесе электрондық цифрлық қолтаңбаның көмегімен, Қор сайтының Жеке кабинеті арқылы;

  электрондық үкімет порталының Жеке кабинеті немесе бір реттік sms-пароль арқылы, мұнда sms-пароль mGov мобильді азаматтар базасында тіркелген салымшылар мен алушылардың ұялы телефонына жіберіледі;

3)    дәстүрлі пошта байланысы арқылы.

Ақпарат алу тәсілін таңдау үшін салымшы (алушы) жеке басын куәландыратын құжатпен БЖЗҚ кеңсесіне келеді. Электрондық цифрлық қолтаңба болған жағдайда, ақпарат алу тәсілін Қор сайтының Жеке кабинетінде таңдауға немесе өзгертуге болады.

Жеке зейнетақы шотының жай-күйі туралы анықтаманы электрондық пошта арқылы алу тәсілін 800 мыңнан астам салымшы (алушы) таңдаған. 2018 жылы оларға шамамен 5,6 млн хабарлама жіберілді.

2019 жылдың 1 қаңтарына қарай 5,2 млн адам зейнетақы шотының жай-күйі туралы анықтаманы Қордың enpf.kz сайтының Жеке кабинеті арқылы алу мүмкіндігіне ие. 

Бір жыл ішінде интернет-хабарландыру тәсілін таңдағандар саны 1,2 млн жуық адамға көбейді. Бұл тәсіл шынында да өте ыңғайлы: зейнетақы шотының жай-күйі туралы анықтаманы кез келген жерде аптасына 7 күн, тәулігіне 24 сағат бойы жедел түрде алып тұруға болады. 

Алғашқы жылдары салымшылар мен алушылардың көпшілігі зейнетақымен қамсыздандыру туралы шарт жасасу барысында шоттан анықтама алу тәсілі ретінде пошта байланысын таңдаған болатын. Бұл ретте зейнетақы шотынан үзінді көшірме салымшылар мен алушыларға жылына бір рет жіберіледі. Ал пошталық мекенжай өзгерген жағдайда, бұл туралы Қорға міндетті түрде хабарлау қажет. Егер хабар берілмесе, БЖЗҚ бұдан кейін зейнетақы жинақтары туралы анықтаманы жібермеуге құқылы. Сонымен қатар шоттарында ақша жоқ салымшылар мен алушыларға үзінді көшірме жіберілмейді.

2019 жылдың қаңтар-ақпан айларында Қор 2019 жылдың 1 қаңтарына қарай зейнетақы жинақтарының жай-күйі туралы 1 миллионға жуық анықтаманы салымшылар мен алушыларға жіберу шарасын жүзеге асыруда. Яғни, БЖЗҚ 2019 жылдың басынан бері 2018 жылдың қорытындысы бойынша салымшыларға (алушыларға) ақпарат беру шарасын жүргізіп жатыр.     

Айта кетелік, үзінді көшірмені Қор кеңсесіне келіп алу тәсілін 1,8 млн астам адам таңдаған. 

 

БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. 2016 жылғы 1 қаңтардан бастап зейнетақы активтерін басқару тиімділігін арттыру бойынша ұсыныстар жасау қызметі Ұлттық қорды басқару кеңесіне берілді. Зейнетақы заңнамасына сәйкес БЖЗҚ міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, зейнетақы төлемдерін, зейнетақы жинақтары мен төлемдерін жеке есепке алуды жүзеге асырады, салымшыға (алушыға) зейнетақы жинақтарының жай-күйі туралы ақпарат береді (толығырақ www.enpf.kz сайтында).

 

«БЖЗҚ» АҚ баспасөз орталығы

АҚ үшін байланыстар: Бұл e-mail спам-боттардан қорғалған. Оны көру үшін сіздің браузеріңізде Java-script-ті қолдау қосылуы қажет.

 
Созақтық палуандар Қазақстан Республикасы грепплинг чемпионатынан жүлдемен оралды Баспаға басу

ImageАқпан айының 23-24 жұлдызы күні Тараз қаласында «Тараз арена» спорт кешенінде грепплингтен Қазақстан Республикасының чемпионаты өтті. Ел біріншілігіне еліміздің барлық облысынан 17 команда, жалпы 400 тарта спортшы қатысты. Чемпионаттың ашылу салтанаттында сөйлеген Грепплинг Қауымдастығының Президенті Қанат Алин: «Қазіргі таңда, елімізде грепплинг қарқынды дамып келеді. Жалпы, осы спорт түрімен балалар, ерлер мен әйелдер шұғылданады, олардың қызығушылығы да жыл санап артып келеді. Жарыстың басты мақсаты грепплинг спортын дамыту, осы спорт түрінен ұлттық құрама командасын құру үшін мықты спортшыларды анықтау және Азия мен Әлем біріншіліктеріне іріктеу»,- деп, спортшыларға сәттілік тіледі. Сондай-ақ, Жамбыл облысы әкімдігінің дене шынықтыру және спорт басқармасы басшысының орынбасары Нұржан Қырықбайұлы құттықтау сөз сөйледі.

      Халықаралық Федерация белгілеген ережеге сәйкес, әрі салмақ дәрежелері бойынша өзара мықтыны анықтады. Түркістан облысының намысын, Созақ ауданының спортшылары қорғады. Екі күнге созылған байрақты бәсекеде 84 келі салмақта Мыңжасар Алпамыс Қазақстан Республкасы грепплинг күресінен 2 орын алып күміс медальді мойынға тақса, 71 келі салмақта қола медалды еншілеген Болат Жолшыбеков жүлделі 3 орынды иеленді. Тағы бір созақтық палуан Бекмұхаммед Қойшыбай 120 келіде қола медаль алды. 

Қазақстан Республикасы грепплинг күресінің қола медалін еншілеген Болат Жолшыбеков, қарсыластарын айқын басымдылықпен жеңіп, көрермен көзайымына айналды. Жартылай финалдық сында Алматылық қарсыласының намысын қорғаған палуанды 15 балл айырмашылығымен мерзімінен бұрын жеңді.

«Байрақты жарыс болғандықтан, қарсыластарымды жеңу оңайға соқпады. Әрбір қарсылас алынбайтын қамалдан көрінді. Алайда, тыңғылықты дайындықтың арқасында нәтижелі өнер көрсеттік»,- дейді Болат Жолшыбеков. 

Айта кету керек, бұған дейін де созақтық герпплинг шеберлері Қазақстан Республикасы кубогында 2 алтын, 2 қола медаль еншілеп, табысты өнер көрсетіп, Түркістан облысының намысын абыроймен қорғаған болатын.

 Аудан әкімінің баспасөз қызметі.

 
Бейнетпен келген береке Баспаға басу

ImageКез келген адамның әдептілігі мен жан дүниесінің сұлулығы ең алдымен бауыр еті балаға ақ сүтін беріп, аялап өсірген ана жүрегінің жылуынан тарайды. Дүниеде анадан артық ешкім жоқ деп ойлаймын. Өйткені Ана қашанда жан-жағына шуағын төгіп, мейірімін шашып, ана құшағынан ғана тыныштық пен бейқамдық, қауіпсіздік, алаңсыздық, жақсылық пен жылылық тауып, сағынышыңды басып, шаршағаныңды ұмытасың.  Ананың мәпелеген алақанының өзінен дертке шипа табасың. Өйткені Анағы дүниеде тең келетін жан, теңеу болмас.

      Мінеки Дүсенбекова Күләйім Сатыбалдықызы да жүрегі кең ана, көпке сәулесі түскен мейірімді жан әрі іскер әйел. Күләйім апай 1960 жылы Тасты ауылында шаруа отбасында дүниеге келіп, онжылдық орта мектепті жақсы тамамдап, Кентау қаласындағы таукен- металлургиялық колледжінде білімін жалғастырады. Техникалық арнаулы білім орнының дипломымен ауылға келіп, еңбек жолын Шолаққорғандағы тұтынушылар одағының асханасында аспазшы болып бастайды. Қызметкерлерге дәмді- дүмді ас дайындап жүріп, Күләй апай өзінің ас дайындау қабілетінің басымдылығына көз жеткізеді. Міне осыдан барып Күләйім Сатыбалдықызының  жеке кәсібіне жол ашылады. Өмірлік жолдасы Сағынтаев Жамшит ағай екеуі еңбек ете жүріп, дүниеге алты перзент әкеледі. Ол уақытта  «бала тудым» деп жылдап демалыста отыру жоқ. Әрекетшіл, пысық келіншектер  дүниеге сәби әкелумен  қатар жұмыстарын бірге алып жүрген. Күләй апайда балаларын бесікке бөлеп қойып, үйде отырып ыстық бәліш пісіріп, арасында әп- сәтте сатып келіп, үй мен базардың ортасында зыр жүгіріп жүріп, еңбек етіп, отбасының берекесін арттырған.

     Тоқсаныншы жылдардың басы елге оңай түскен жоқ. Еліміз Егемендікке  қол жеткізіп, өз алдымызға жаңа мемлекет болып қайта құрылу кезінде кәдімгідей елдің арасында біраз қиыншылық болғаны шындық. Десекте, елдің ынтымағы мен бірлігі еліміздің өз еңсесін тез көтеруге, Елбасының мемлекеттік саясатының жүзеге асуына ықпал етті.

      Күләй апайда сол жылдары отбасылық кәсіпті қолға алып, балаларды тәрбилей жүріп, Алматы, Бішкек, Ташкент қалаларына қатынап, зат тасып, сауда-саттықпен айналысады. Елге қажетті тауарлармен арнайы дүкен ашып, төменгі бағада сатып, бір айлық, бір пенсияға қарап отырған үйемелі сүйемелі жандарға жағдайына қарап қарызға ұластырып өз дүкенінің жұмысын дөңгелетіп әкетті. Сондай-ақ, Күләй апайдың  мұқтаж жандарға жасаған қайырымдылығы мен қамқорлығы өз алдына үлкен сауапты іс. Ондай сауапты істерін Күләй апай еш уақытта жар салып жариялап айтқан емес. Бұл ол кісінің өмір бойы дәстүрге айналдырған адами қасиеті. Мұндай әрекетті өзінің аналық борышы деп санайды. Айтары жоқ, бейнетпен келген береке елге белгілі болып тұрады. Жамшит ағай мен Күләй апай ұл қыздарының барлығын жоғары оқу орындарында оқытып, жақсы тәрбие берген. Бүгінде ұлдары ұяда, қыздары қияда болсада ата-ананадан көрген кәсіпті  жалғап, жеке кәсіпкерлікпен айналсуда. Ал, Күләй апай бейнетінің зейнетіне бөленіп, немерелерінің тәрбиесімен айналысып, отбасының шамшырағына айналған. Күләй апай қолындағы екі немере қызын ертіп  Дубайға барғанын аса мақтанышпен еске алды. Дубайға жай қыдырып бармады, білімді немерелерін қолдап барды. Білімді, зерек қыздар ментальды арифметикадан еліміздің ішінде болған байқауда жеңімпаз атанып, Дубайда өтетін халықаралық жарысқа жолдама жеңіп алады. Сол кезде немерелерінің шет мемлекетте бақтарын сынау мүмкіндіктеріне бей жай қарамай, елді, тілді білмеседе, тіпті қаржылық шығынға да қарамастан кіп - кішкентай 8-9 жасар Інжу мен Көркемін  өзі алып барып керемет байқауда бақ сынауларына жағдай жасайды. Ауданымыздан шыққан бүлдіршін қыздар жүлделі орындарға ие болып, өз деңгейлерін жоғары көрсеткен. Күләй апай нағыз патриоттық танытып,  Қазақстанның көк жалауын желбіретіп, немерелеріне жанкүйер болады. «- Ия, өз балаларымды кішкентай кездерінде шет елге алып шықпағам, тіпті өз елімізде де оларды ертіп жүріп қыдыртпағам. Ол мүмкінде болмады. Қашанда қарбалас тірлік. Жасыратыны жоқ, барлығы қаржыға да келіп тіреледі. Алайда, ендігі кезекте шамам келіп, Алла қуат беріп тұрса немерелеріме ел тантып, жер танытытқым келеді. Оған өз пенсиямда жетеді деп ойлаймын. Шүкір. Дейді Күләй апай»

     Ия, сөз жоқ Күләй апай бейнетінің зейнетін көріп отырған нағыз іскер, бақытты ана.   

 Нұржамал МАЙУСОВА

Қазақстан Журналистер одағының мүшесі   

 
Мүмкіндігі шектеулі балалары бар отбасылар тегін психологиялық көмекке онлайн жүгіне алады Баспаға басу

  «Азаматтарға арналған үкіметтің» әлеуметтік сала бойынша кеңес беретін 1411 тегін нөміріне қоңырау шалу арқылы мүгедектігі бар балаларды тәрбиелеп отырғандар псилохологиялық көмек алу кезегін брондай алады.

Мүгедектігі бар балаларды тәрбиелеп отырған ата-аналарға психологиялық кеңес беретін онлайн қолдау қызметін құру жөніндегі әріптестік келісім ҚР Денсаулық сақтау және әлеуметтік даму министрлігі, «Азаматтарға арналған үкімет» мемлекеттік корпорациясы және Қазақстан-Ресей медицина университетінің арасында 2015 жылы жасалған. 

Онлайн қолдау қызметі құрылғалы бері барлық аймақтан2,4 мың өтініш келіп түскен. Қоңыраулардың дені Алматы, Атырау және Түркістан облыстарына тиесілі.

1411 байланыс орталығына хабарласқандар онлайн көмек алу уақытын белгілеп, кезекке тұрады. Медицина университетінің мамандарымен байланыс «Skype» бағдарламасы арқылы жүзеге асады, ол үшін белгіленген уақытта krmu1411 аккаунтына онлайн қоңырау шалу қажет.

Мүмкіндігі шектеулі балалардың ата-аналарына психологиялық көмекті медицина университетінің психиатрия, жалпы медициналық психология және педагогика кафедраларының кәсіби мамандары береді.

Психологтардың қызметіне жүгіну – балаларды тәрбиелеу және оқыту бағдарламаларын таңдау бойынша ақылы мамандардың қызметін төлей алмайтын және кәсіби мамандардың қабылдауына бара алмайтын шалғайдағы елдімекендерде тұратын ата-аналар үшін жақсы мүмкіндік.

 

 «Азаматтарға арналған үкімет»

мемлекеттік корпорациясы» КЕАҚ

баспасөз қызметі
 
ТҮРКІСТАНДА ШАҒЫН ФУТБОЛДАН «ПРЕМЬЕР-ЛИГА» БАСТАЛДЫ Баспаға басу

ImageЖуырда Түркістан облысы әкімдігінің есеп беру жиынында жас тұрғындардың бірі өңір басшысына жасөспірімдер мен жастар арасында футболдан жарыс өткізу жөнінде ұсыныс айтқан болатын.  Жансейіт Түймебаев жұртшылық алдында бұл бастамаға қолдау көрсетенінін әрі жарыстың ашылу салтанатына арнайы баратынын  мәлімдеген-ді. Уәде орындалды.

Кеше Түркістан қаласында жаңадан ашылған «Жастар ресурстық орталығының» спорт алаңында футболдан облыс әкімінің жүлдесіне арналған қала чемпионаты басталды. Дүбірлі бәсекеге Түркістандағы шағынаудандар мен елді мекендерден 30 команда қатысуға құлшынып отыр. Аула клубтары арасындағы жарыстың ашылу салтанатына облыс әкімі Жансейіт Түймебаев арнайы қатысып, қатысушыларға сәттілік тіледі.

«Жасөспірімдер мен жастар спортпен шұғылданып, үйрімелерге қатысып жүрсе, жаман әдеттерден аулақ болады. Аула клубтары арасындағы бұл чемпионат бұқаралық спортты дамытуға серпін береді деп сенемін», – деген ол Түркістанда заман талабына сай спорт кешендері мен мектептері көбейетінін айтты.

Шағын футбол додасы бірнеше айға дейін созылады. Спортсүйер қауым бұны Түркістан қаласының кішігірім «премьер-лигасы» деп те бағалауда.  Облыс әкімдігінің қолдауымен өтіп жатқан турнир жеңімпаздары мен жүлдегерлері, үздік ойыншыларына бағалы сыйлықтар тапсырылады. Алдағы уақытта Түркістанда спорттық сайыстар саны артады. Бұл өз кезегінде жасөспірімдер арасындағы құқықбұзушылықты азайтады деген сенім бар.

 Түркістан облысы әкімінің баспасөз қызметі

 
ТҮРКІСТАНДА «SMARTCITY» АЯСЫНДА «ҚАУІПСІЗ АУЛА» ЖӘНЕ «АҚЫЛДЫ АЯЛДАМА» ЖОБАЛАРЫ ЖҮЗЕГЕ АСАДЫ Баспаға басу

ImageТүркістан облысындағы 902 мектептің 775-і немесе 86,1 пайызы интернет желісіне қосылған. Сондай-ақ, 735 білім ұясында, яғни 81,4 пайызында WI-FI нүктелерімен қамтамасыз етілген.  Жыл соңына дейін шалғай ауылдардағы 127 мектепті кең жолақты интернетпен және 167 мектепті WI-FI нүктелерімен толық қамту осы жылдың жұмыс жоспарына енгізілді. Бұл туралы Өңірлік коммуникациялар қызметінде өткен баспасөз жиынында облыстық Ақпараттандыру, мемлекеттік қызметтер көрсету және архивтер басқармасының басшысы Бастар Есқараев мәлімдеді.

 2018 жылды қорытындылған басқарма басшысы өңірде «Цифрлық Қазақстан» мемлекеттік бағдарламасы 5 бағыт бойынша жүзеге асып келе жатқанын айтты.

 «Энергетика және тұрғын үй-коммуналдық шаруашылық саласы бойынша "SmartCity" тұжырымдамасы іске асырылуда. Атап айтқанда, Түркістан қаласындағы Отырар мөлтек ауданында 10 көп қабатты тұрғын үйге «E-SHANYRAQ» жүйесіне толықтай интеграциялау жұмыстары жасалынды. Бұл, импульсті қашықтықтан басқарылатын есептегіштер арқылы суды, жылуды және электр энергиясының көздерін берілуін бақылау. Яғни, осы арқылы шығындарды бекіту, қаржатты жұмсау мәселелерінде қызметінің ашықтығы қамтамасыз етіледі, тұрғындар интернет арқылы есептеулер мен есеп айырысулардың дұрыстығын тексере алады, үй бойынша шығындармен табыстарды бақылауда болады және ТКШ мәселелері бойынша онлайн түрде өтініштер қабылданады», – деді Бастар Әуелханұлы.

 Сонымен қатар, «SmartCity» бағдарламасы негізінде биыл пилоттық жоба ретінде Түркістан қаласындағы саябақтар мен көшелерге «Ақылды жарықтандыру» жобасын енгізу жұмыстары қолға алынды. Бұл жарық беру аймағында өздігінен автоматты түрде жарық сөндіріледі немесе азаяды, сондай-ақ автокөліктер жарықтандыру аймағын кесіп өткен кезде ғана автоматты түрде қайта қосылуына мүмкіндік береді. Қазіргі таңда, облыс бойынша 700 көше күн панельдері жүйесінде фотореле датчиктері бар жарық шамдары орнатылған. Облыс бойынша механикалық таймер жүйесі бойынша 1294 ақылды жарық шамдары орнатылды.

 Одан бөлек, қаладағы тұрғын үйлерге 8 дана бейнебақылау камералары орнатылды және пилоттық жоба ретінде жол ережелерін бақылау үшін 6-бейнекамералармен қамтамасыз етілді.

 Цифрландыру жүйесі әсіресе мемлекеттік қызмет көрсету саласында кең қолданыста. Мәселен, 2018 жылы 10,955 мың мемлекеттік қызмет көрсетілген. Оның 9,350 мыңы электрондық түрде, қаған 1 372 мыңы қағаз түрінде іске асырылған.

 

Түркістан облысы әкімінің баспасөз қызметі
 
Ж.ТҮЙМЕБАЕВ ЖАСТАРДЫҢ ТЫҢ ИДЕЯЛАРЫНА ҚОЛДАУ БІЛДІРДІ Баспаға басу

ImageТүркістан қаласында «Жаңарған Түркістан – жаңа мүмкіндіктер алаңы» атты өңірлік жастар форумы өтті. Оған Түркістан облысының әкімі Жансейіт Түймебаев пен ҚР Қоғамдық даму вице-министрі Жұлдыз Омарбекова қатысты. Еркін форматта өткен жиында түрлі салада еңбек етіп жүрген өңір жастары өз жобалары мен жұмыстары туралы баяндап, облыс әкіміне талап-тілектері мен ұсыныстарын да жеткізе білді.

Мәселен, Ақерке Әліпова атты жас кәсіпкер қаланың орталығынан ұлттық сусындар мен тағамдар ұсынатын үлкен дәмхана ашып, өз кәсібін кеңейткісі келетінін айтса, Азия ойындарының чемпионы Дидар Хамза Түркістан жастарына заманауи спорт ғимараттары қажет екеніне тоқталды. Өзге де жастар пікірлерін ортаға салды.

Әрбір жастың сөзін мұқият тыңдаған облыс әкімі Жансейіт Түймебаев осы жиындағы ұсыныстар түгел хаттамаға енгізіліп, арнайы жұмыс жүргізілетінін айтты.

 «Елбасымыз «Тәуелсіздіктің ұрпақтары» атты жастар форумында жастарды қолдау бағытында нақты міндеттер жүктеді. Осыған орай, Түркістан облысында да жұмыстар қолға алынып жатыр. Биыл «Жастарды тұрғын үймен қамту» жобасы аясында түрлі көздерден 260 жас үймен қамтылады. Жалпы жастарды баспанамен қамту ісі жанданады. Жыл сайын облыста 4 мыңдай оқушы жоғары немесе арнаулы оқу орнына түсе алмайды екен. Олардың арасында көпбалалы отбасыдан шыққандар көп. Сол жастар үшін біз “Мобильді оқу орталықтары” жобасын қолға алып,  4000 баланы еңбек нарығында сұраныс жоғары мамандықтарға дайындаймыз. Бүгінгі ашылған жастар орталығы жастар үшін қызмет ететіндіктен мұнда бюрократия емес, демократия болсын. Осы орталықта жастар үшін елге танымал азаматтармен «Рухани жаңғыру дәрістері» тақырыбында кездесулер тұрақты өткізілгені жөн. Түркістанда спорт кешендері де, сәулетті ғимараттар да салынады. Бұның бәрі жастар үшін жасалып отырған мүмкіндік», – деді Жансейіт Түймебаев.

Сондай-ақ өңірде 100 гид арнайы оқу курсынан өтіп, жұмысқа орналасады және «Жастардың туристік ассоциациясын» құрылады. Елбасы қолдауымен Түркістанда салынып жатқан ғимараттардың құрылысына өңірдің 3000 жас өрені жұмысқа тартылып, 1300 жас «Жасыл ел» бағдарламасы арқылы жұмыспен қамтылады. Жас кәсіпкерлерге 4 пайызбен 2 млн. теңгеге дейін несие беріледі. “Жастар практикасы” бағдарламасы аясында 5500-ге жуық жасқа қолдау білдіру үшін 2 млрд. теңге бөлінеді.

Жиында ҚР қоғамдық даму вице-министрі Жұлдыз Омарбекова да құттықтау сөз сөйлеп, Түркістан жастарының еңбекқорлығы мен белсенділігін жоғары бағалады.

Форумнан кейін Түркістан облысында жастар жылының ашылуына орай «Махаббат мұнарасы» мюзиклі көпшілік назарына ұсынылды.

 Түркістан облысы әкімінің баспасөз қызметі

 
ТҮРКІСТАНДА TURKESTAN HUB IT ОРТАЛЫҒЫ АШЫЛДЫ Баспаға басу

ImageБүгін Түркістан қаласында Тurkestan hub IT орталығы ашылды. Бұл –  IT саласындағы кәсіпкерлердің, жас мамандардың, инвесторлардың ынтымақтастығы үшін жағдай жасалған ашық алаң. Мұнда қатысушылар тәжірибе алмасып, идеяларды іске асыра алады. Бүгін ашылған «Жастар ресурстық орталығының» ғимаратында орналасқан бұл орталыққа елімізге танымал ІТ саласының өкілдері жоғары баға беріп отыр.

Орталықтың ашылуына Түркістан облысының әкімі Жансейіт Түймебаев пен ҚР Қоғамдық даму вице-министрі Жұлдыз Омарбекова қатысып, жастарға сәттілік тіледі.

Тurkestan hub IT орталығында «ІТ park» жас бағдарламашылар мектебі іске қосылды. Мақсат – түркістандық жастарды осы салаға бейімдеп, олардың цифрлық сауаттылығын арттыру. Мамандар даярлай отырып,   отандық ІТ өнімдері мен жаңа компаниялар ашу. Кез келген жас осында келіп, ІТ саласы бойынша білім алып, білімдерін жетілдіріп, жаңа стартап жобалары мен тың идеяларын ұсына алады. ІТ park мектебінің шәкірті атануға 14 пен 29 жас аралығындағы облыс жастарының мүмкіндігі бар. Сонымен бірге мұнда жастарға модельдеу, бағдарламалау, смартфондарға арналған мобильдік қосымшаларды іске қосу мен сайт ашу және тағы басқа жұмыстар бойынша тәжірибелік сабақтар ұсынылады.  Тек қана оқытып қана қоймай, жоба әзірленіп, коммерциализация жасалынады. Жастардың жобаларына инвесторлар тарту арқылы өз кәсібін ашуға мүмкіндіктер қарастырылған.

Сондай-ақ мұнда Түркістан базасында хаб прототиптеу зертханалары мен отандық IT-компанияларды зерттеуге арналған орталықтарды орналастыру көзделіп отыр. Бұл қатысушыларға прототиптерді әзірлеуге және ғылыми-зерттеу жұмыстарымен айналысуға мүмкіндік береді. Алдағы уақытта бұл орталық елге пайдалы жобалардың ұстаханасына айналады деген сенім бар.

  Түркістан облысы әкімінің баспасөз қызметі

 
Зейнетақы жинақтарының жай-күйі туралы ақпарат беру қызметі көрсетілетін 60 мемлекеттік қызметтің ішінде үздіктердің бірі болып танылды Баспаға басу
Қазақстан Республикасының Мемлекеттік қызмет істері және сыбайлас жемқорлыққа қарсы іс-қимыл агенттігінің тапсырысы бойынша «САНДЖ» зерттеу компаниясының мемлекеттік қызметтерді көрсету сапасына жүргізген қоғамдық мониторинг нәтижесінде «Бірыңғай жинақтаушы зейнетақы қоры салымшысының (алушысының) зейнетақы жинақтарының (инвестициялық кірістерін ескере отырып) жай-күйі туралы ақпарат беру» қызметі үздік бестіктің қатарына енді.   

Мемлекеттік қызметтердің көрсетілу сапасына қатысты қоғамдық мониторинг 2018 жылдың тамыз-қазан айлары аралығында өткізілді. Зерттеу барысында Қазақстанның барлық өңірлерінде 10 000 қызмет алушы арасында сауалнамалық сұрау жүргізілді. Бұл ретте көрсетілетін 60 мемлекеттік қызмет  негізге алынды.

Мониторинг аясында қызмет алушылар арасында сауалнамалық сұрау жүргізіліп, қызмет көрсетуші мен қызмет алушылардан тиянақты сұхбаттар алынды. Сонымен қатар «Құпия сатып алушы» әдісі бойынша бақылау жүргізіліп, бірқатар фокус-топтық талқылаулар ұйымдастырылды.

Зерттеу жүргізудегі мақсат – қызмет алушылардың көрсетілетін қызметтердің сапасына қанағаттанушылық деңгейін бағалау. Бұл ретте ақпараттың қолжетімділігі, қызмет көрсету мерзімінің сақталуы, қызмет көрсету деңгейі (сыпайылық, біліктілік, қызметкерлердің шапшаңдығы), құжаттардың дұрыс рәсімделуі, шарттардың ыңғайлылығы ескерілді. 

Зерттеу қорытындысы бойынша БЖЗҚ салымшысының (алушысының) зейнетақы жинақтарының жай-күйі туралы ақпарат беру қызметіне баға беру барысы ақпараттың сапасы мен қолжетімділігі, жеделдігі мен құзыреттілігі бойынша жоғары нәтижелер көрсетті: сауалнамаға жауап берушілердің 80,4 пайызы қызметтер бойынша ақпараттың ашықтығына және қолжетімділігіне риза. Бұл ретте жауап берушілердің 82,9 пайызының пікірінше ақпараттар ашық және шынайы. Жауап берушілердің 88,3 пайызының қызметтердің көрсетілу мерзіміне және 92,1 пайызының құжаттардың жиналу және әзірлеу мерзіміне көңілдері толады.  

Сауалнамаға қатысушылардың 79,8 пайызы қызмет көрсетушінің мамандарының біліктілігін жоғары бағаласа, 80,7 пайызы үшін қызметкерлердің сыпайылығы, әдептілігі қанағаттанарлық деңгейде болды. Сонымен қатар қызметкерлерінің шапшаңдығын сауалнамаға жауап берушілердің 81,3 пайызы атап өтсе, 80,4  пайызы қызмет көрсетушіге сенеді.    

Көрсетілетін қызметтерді барынша әділ бағалау үшін «Құпия сатып алушы» әдісі де қолданылды.  Ол БЖЗҚ филиалында және Астана қаласында Халыққа қызмет көрсету орталықтарының бірінде жүзеге асырылды. Құпия сатып алушы көрсетілетін қызметтердің сапасын үш өлшем бойынша бағалауы тиіс болды. Олар: 1) ақпаратты сайттан іздеу, 2) ақпаратты стендтен іздеу, 3) байланыс орталығына қоңырау шалу.   

Құпия сатып алушы БЖЗҚ-ның https://www.enpf.kz сайтын жоғары бағалады. Ол сайттың интерфейсін, онда байланыс орталығының телефон нөмірі бар екендігін, бір бөлімнен екінші бөлімге тез ауысуға болатындығын және ақпараттардың орыс және қазақ тілдерінде қолжетімді екендігін атап өтті. Қордың байланыс орталығы жұмысының сапасына да жоғары балл берілді. Өйткені, Қор маманы байланысқа тез шығып, қойылған сұрақтардың барлығына нақты және толыққанды жауап берген.

БЖЗҚ-ның Астана қаласындағы филиалына барған кезде де қызмет көрсетуші қызметкерлердің жұмысына Құпия сатып алушының көңілі толды.  

«Операция бөлімінің қызметкері менің барлық сұрақтарыма жауап берді және тіпті зейнетақы жарналарының түсуіне қатысты ақпаратты поштама жіберуді ұсынды. Ол сонымен қатар БЖЗҚ ұялы қосымшасының бар екендігін айтып, тіркелуге көмектесті. БЖЗҚ ұялы қосымшасы мен БЖЗҚ сайтындағы Жеке кабинет өте ыңғайлы. Зейнетақы жарналарының түсуін үнемі қадағалап отыруға мүмкіндік бар».

Бұл зерттеудің негізгі нәтижелері тұрғындардың «БЖЗҚ» АҚ қызмет көрсету сапасына көңілдері толатындығын көрсетті. Ал бұл Қорды қызмет көрсету сапасын одан әрі жетілдіруге ынталандыра түседі. 

Мониторинг нәтижесі бойынша толық есепті Қазақстан Республикасы Ұлттық Банкінің сайтынан мына сілтеме бойынша:   https://nationalbank.kz/?docid=3525&switch=kazakh көре аласыз.

 БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. 2016 жылғы 1 қаңтардан бастап зейнетақы активтерін басқару тиімділігін арттыру бойынша ұсыныстар жасау қызметі Ұлттық қорды басқару кеңесіне берілді. Зейнетақы заңнамасына сәйкес БЖЗҚ міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, зейнетақы төлемдерін, зейнетақы жинақтары мен төлемдерін жеке есепке алуды жүзеге асырады, салымшыға (алушыға) зейнетақы жинақтарының жай-күйі туралы ақпарат береді (толығырақ www.enpf.kz сайтында).

 
«Е-нотариат» жүйесі мен БЖЗҚ ақпараттық жүйесінің өзара ықпалдастығы жүзеге асырылды Баспаға басу

«БЖЗҚ» АҚ «Қазақстан Республикасында зейнетақымен қамсыздандыру туралы» ҚР Заңына сәйкес салымшы (алушы) қайтыс болған жағдайда нотариустарға және шетелдік консулдық мекемелерге, олардың өндірісіндегі мұрагерлік істер бойынша жеке зейнетақы шотының және онда қаражаттың бар болуы туралы анықтама береді.    

Бірыңғай жинақтаушы зейнетақы қоры (бұдан әрі – БЖЗҚ, Қор) мен Қазақстан Республикасы нотариустарының өзара іс-қимылын оңтайландыру мақсатында Қазақстан Республикасының Әділет министрлігі, Республикалық нотариаттық палата, «Ұлттық ақпараттық технологиялар» акционерлік қоғамы («ҰАТ» АҚ) және БЖЗҚ арасында «Е-нотариат» Бірыңғай нотариалдық ақпараттық жүйесі мен Бірыңғай жинақтаушы зейнетақы қоры ақпараттық жүйесінің өзара іс-қимылы туралы Шарт жасалды. Бұл шара «Қазақстан Республикасында зейнетақымен қамсыздандыру туралы» Қазақстан Республикасының Заңында реттелген болатын.

Енді аталған Шарт аясында нотариустар өздерінің өндірісіндегі мұрагерлік істер бойынша (мұрагерлер өтініш берген жағдайда) қайтыс болған салымшылардың (алушылардың) Қорда жеке зейнетақы шотының және онда ақшаның болуы туралы БЖЗҚ-ға «Е-нотариат» Бірыңғай нотариалдық ақпараттық жүйесі арқылы онлайн тәртібінде (БЖЗҚ-ға хат жүзінде сауалдар жолдамастан) сауалдар жолдай алады.      

Қор өз кезегінде салымшылар мен алушылар Қазақстан Республикасының нотариустары куәландырған немесе растаған құжаттарды ұсынған жағдайда «Е-нотариат» Бірыңғай нотариалдық ақпараттық жүйесіне сауал жолдап, салымшылар мен алушылардың Қорға ұсынған құжаттарына қатысты жасалған нотариалдық әрекеттер бойынша ресми растау құжатын алады.

Бұл қызмет нотариустарға жүгінген мұрагерлердің уақытын үнемдейді және қағаздық құжатайналымын жояды.          

   

БЖЗҚ 2013 жылғы 22 тамызда «ГНПФ» ЖЗҚ» АҚ негізінде құрылды. БЖЗҚ құрылтайшысы және акционері – Қазақстан Республикасы Қаржы министрлігінің «Мемлекеттік мүлік және жекешелендіру комитеті» ММ арқылы Қазақстан Республикасының Үкіметі. БЖЗҚ зейнетақы активтерін сенімгерлікпен басқаруды Қазақстан Республикасының Ұлттық Банкі жүзеге асырады. 2016 жылғы 1 қаңтардан бастап зейнетақы активтерін басқару тиімділігін арттыру бойынша ұсыныстар жасау қызметі Ұлттық қорды басқару кеңесіне берілді. Зейнетақы заңнамасына сәйкес БЖЗҚ міндетті зейнетақы жарналарын, міндетті кәсіптік зейнетақы жарналарын, ерікті зейнетақы жарналарын тартуды, зейнетақы төлемдерін, зейнетақы жинақтары мен төлемдерін жеке есепке алуды жүзеге асырады, салымшыға (алушыға) зейнетақы жинақтарының жай-күйі туралы ақпарат береді (толығырақ www.enpf.kz сайтында).

 

«БЖЗҚ» АҚ баспасөз орталығы

БАҚ үшін байланыстар: Бұл e-mail спам-боттардан қорғалған. Оны көру үшін сіздің браузеріңізде Java-script-ті қолдау қосылуы қажет.

 

 
<< [Бірінші] < [Алдыңғы] 1 2 3 4 5 6 7 8 9 10 [Келесі] > [Соңғы] >>

Нәтижелер 46 - 60 ішінен 677

Әкімнің блогы

Мемлекеттік рәміздер

     

 

 

 

 

Жаңалықтар күнтізбесі

 
« 22 Сәуір 19 »
ДсСсСрБсЖмСнЖк
1234567
891011121314
15161718192021
22232425262728
2930         

Валюта бағамы

Информационный сервер xFRK: валютные баннеры для Вашего сайта

Ауа райы

Пікіртерім

Біздің жаңа дизайнға баға беріңіз?
 

Жаңалықтар таспасы